Story : When I was puzzled

बाखँचा

जि ज्यो जूबले

जि थौं तस्सकं म्हाइपु गन वने गन वने जुया वल । थुबले हे लाक लुमंसेवल चन्दाचा । गुलिदत नाप मलागु, छुं खबर तक नं मदु । उली तापाम्ह नं जा मखु । अथेसां नापलाय्गु ह्वःता चुमलाना च्वंगु । फोन याय्ला जि वय् धका ? तर मखु, आसे, वयात ला यक्वो लिपा थौं सरप्राइज हे ब्यू वनेका जिं । तुरुन्त वसः पुना स्वस्यें वयाथाय् स्वया वना । मने अनेतने खँ वायेका वना – नाप लाइला मलाइला, नाप मलाना थःहे सरप्राइज्ड जकं जुइला, ल्ह्वनला गंसि जुया च्वनला, मस्तनं म्हपूm हे मखा ज्वी । आकाझाकां परमेश्वर तकं लुमंके वल नाप लाय्मा धका फ्वनेत । हानं मती वल, वं जित छु धाइ ज्वी थौं खनी बले । स्कूलंनिसें नापं ब्वनाम्ह चन्दाचा । निम्हसिया छपाहे तुती, ला व लुसी थें जुया नं आ इहिपा लिपा गुलि तापाना वन । मती खँ वाय्कुं वाय्कुं वयाथाय् थ्यंगु हे मचा ।

वया छेँय् थ्यंका तालं ग्वयातःगु मखनेवं जिगु नुगः कुच्छी थाहां वल । तर व दइला मदइला । घण्टी न्याय्का नं मत मदु खनी । अनायाश चन्दा धका सःते वल जित । वं नं सःते सिमधनी “अय् बेमान, स्वः गुलि लिपा आपुलुखं खने दय्क वःगु” धका झ्यालं दुपिसातं छस्वां कुने थ्यंका पाच्यूवल । निम्हं तस्सकं लयताल । “बेमान, खबर छक याय् म्वाःला जा नय्गु याना वय्त्यना धका ?” धाल । जि न्हिला जक च्वना । अले धया “छंगु ख्वाः स्वय् हथाय् चाःगुलिं तिंन्हुया वयाका” ।

निम्हं तले भुतुली थहां वना । वया मस्त निम्हं, छम्ह अमेरिका व मेम्ह अष्ट्रेलिया वने धुंकल खनी । निम्हत्यपुया जा भतिचा गाइमखु धका मेगु देछुत । जिपिं गफ याना हे च्वना । वया मस्तय् बारे उप्पो खँ ल्हाना च्वन । माँ–बौपिनि थःस्वयां मस्तय् उपो च्यूता जुयाच्वनी ।

जा ताना हल । स्वम्हं नापं जानय्त फय्तुना । जित पाउँसे अचारया बास वःगु ताल । व बासं हे जि जा कुहां वन । तर चन्दाचां जित अचार तया मब्यू । वया लोमन ज्वीका धका मती । वया भातम्ह न्ह्योने दुगुलिं अचार तिं धाय्नं मछाल । सुंक नय् सिधय्का । हानं घौछी गफ याना नं खँल्हाये लुमधं जिमित । अथेसां वयात – आ मस्त नं पिहां वने धुंकुगुलिं फुर्सद दै, यकनं हे जिथाय् जा नय्गु याना वा अले च्वना गफ याय् धका जि कुहां वया । चन्दाचां जित कुनेतक्क तःवल न्हापाया हे चालां । लुखाय् थ्यंका वं मछामछा धाल, “थन फोहर वाँछ्वइगु याःगुलिं तस्सकं हे दुःख जुल । आ झन तांन्वया वःगुलिं पाउँक नवः” । जि झस्स लुमन न्हाच जा नयाबले वया अचार तय् लोमंकल धका अचारया वास कया जा नया च्वनागुला व फोहरया द्वँ पाउँक नवगु खनीका धका सिसातं जिला ज्यो जुल ।

शोभा शाक्य

गुजिबहाः, यल

२०७०-१२-१७

(थ्वः बाखँचा मन्तुना मिसा खलः, यलया ग्वसालय् जूगु “मिसा साहित्य गोष्ठी” २०७०-१२-२९ शनिवाःस प्रस्तुत यानागु खः)